كتاب "شاب كشك" 2016 للمخرج عمرو سلامه

كتاب "شاب كشك"  2016 للمخرج عمرو سلامه 

شاب كشك

كتاب شاب كشك للمخرج عمرو سلامه الذى ستيم صدوره هذا الشهر ويتم بيعه فى معرض القاهره الدولى للكتاب 2016 

يذكر أن هذا هو الإصدار الأحدث لسلسة شاب كشك فى رحلة البحث عن الجادون 



الإصدار الجديد من كتاب "شاب كشك" للمخرج عمرو سلامة.


تصميم الغلاف: كريم آدم.

اصدارات دار دَوِّنْ للنشر والتوزيع



كيف تكون مبسوط حبتين ؟؟!!-----------------------------
اشتري علبة شوكولاتة مستوردة غالية و كلها.

بص على بنت حلوة و إعرف أنها لو عرفتك كويس أكيد هتحبك.
إلعب لعبة مالعبتهاش من و إنت صغير.
إعرق و إنهج و حس إنك عايش
إطفي نور أودتك شغل التكييف إسمع أكثر مزيكا بتحبها و إسرح معاها.
بص لأهلك و عرفهم قد إيه بتحبهم.
بص للي تحتك و إعرف قيمة كل حاجة معاك.
بص للي فوقيك و إعرف إن رغبتك إنك تبقى زيهم هي اللي مدية طعم لحياتك.
إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك..
روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس..
في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام.
إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك.
إعرف إنك كائن مهم و في كل لحظة بتغير إتجاه التاريخ.
بص لشحات واقف جمبك.. ماتديلوش ولا نكلة.. بس سلم عليه و إضحكله و قوله “عامل إيه؟ تمام؟”
سلم على واحد صاحبك و خدوا بالحضن.. و زود مدة الحضن ثانية زيادة.. هتقوله حاجات كثير..
بص لبنت مغرورة و إضحك من جواك.
بص لبنت وحشة و عاكسها بنظراتك و إعرف إنها هترجع البيت مبسوطة
بدون سبب إبعت رسالة لأي حد بتحبه قوله حاجة حلوة.
إفتح شباك العربية و إطلع على طريق سريع خلي الهوا “يطس” في وشك.. صرخ.. بس إتأكد إنك مش داخل على لجنة و إنك لوحدك و مافيش حد تعرفه في العربيات اللي حوليك.
خلى اللي يكره يكره و اللي يشتم يشتم وإعرف إنهم مضيعين وقتهم.
إتأكد إنك لو عارف إنك هتموت بكرة هتعمل نفس اللي بتعمله دلوقتي.
حب جامد قوي حتى لو حبك مش هيستمر لحد بليل.
كل أكلة حلوة قوي.. بس ماتخليهاش تشبعك.
إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها.
ماتشربش شيشة أو سجاير.. إشرب الهوا.. إستمتع بيه.. مش هتعرف قيمته إلا لو خلوا الهوا بفلوس.. ساعتها هتستمع
أكسب نفسك و حب حد بيكرهك.
إكسب نفسك ثاني و حب حد بتكرهه.
إكسب نفسك ثاني و إنسى حد لسه بتحبه من غير ما تكرهه.
إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.
إنزل شجع مع الزملكاوية لما يكسبوا.. حتى لو إنت مش زملكاوي.
شوف فيلم الكيف و ماتتفرجش على آخر ربع ساعة فيه.
إتفرج على الناظر من أول ما بيظهر محمد سعد.
لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم..
جرب أكلة جديدة في مطعم فخم.. ثمنها يخرب بيتك.. و روح و إنت مبسوط.
إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار.
إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن.
إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون.
إفتكر قبل ما تنام كل الكلام الحلو اللي سمعت الناس بتقوله عنك.
كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعلا.
شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.
فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب.
سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك.
إستحمى في نص ساعة.. خلى المية تنزل على وشك و إسمع صوتها كويس.
جيب لنفسك هدية و إستنى لحد عيد ميلادك و إديها لنفسك.
جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة.
إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.
أشكر كل الناس بسبب و من غير سبب.
إسمع أغنية مدحت صالح وانا ويايا بعيش زي المليونيرات و شوفها على اليو تيوب و إضحك منها أو عليها.. بس في الحالتين هتضحك.
لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين..
إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني.
إتبسط.. و لو مش عايز تتبسط.. مش هتعرف تعكنن عليا.
اصل انا مبسوط ...
لـ عمرو سلامة

للتعرف على المخرج عمرو سلامة 




أخرج أربع أفلام سينمائية طويلة
(زي النهاردة )
(أسماء – مستوحى من أحداث حقيقية )
(لامؤاخذة )
(صنع في مصر )

كما شارك في إخراج فيلما تسجيليا طويلا بعنوان (التحرير – الطيب و الشرس و السياسي) و قام بإخراج جزء (السياسي).

كتب سيناريو فيلم (مصور قتيل) وأخرجه كريم العدل وطرح في دور العرض في ديسيمبر .

حائز على العديد من الجوائز العالمية والمحلية، منهم جائزة أحسن مخرج في مسابقة آفاق جديدة في مهرجان أبوظبي السينمائي الدولي، وجائزة الفابريزي في مهرجان فينيسيا الدولي.



الإبتساماتإخفاء